🇮🇳#মধ্যবিত্তৰ সপোন আমি মধ্যবিত্ত--।পকেটত এমুঠিমান টকা, বুকুত বলে নোৱাৰা অযুত আশা---।মুখখনৰ তুলনাত অধিক দীঘল এটা নাক লৈ জীয়াই থাকো আমি।চৌবিশ ঘণ্টা এটাই ভয় "আনে বা কি কয়---?" আনৰ মন্তব্যৰ তুলাচনীৰে জোখো আমাৰ জীৱন। ভাল বুলিলে ভাল---,বেয়া বুলিলে বেয়া---। "বৰ ডাঙৰ ঘৰ সাজিলা---!" "সুন্দৰ গাড়ী ল'লা---!" এইষাৰ শুনিলেই যেন জীৱন ধন্য হৈ যায়।এহাতমান ফুলি যায় বুকু।"সচাঁকৈ সফল হ'লো দেই মই--!" ঋণৰ ভৰত ককাল কেচকেচায়--।তথাপি মুখত জোনাকৰ ঢল বাগৰে। "এহ্‌--,কিনো আৰু--।" ল'ৰা ছোৱালীৰ বিয়া--।ডাঙৰকৈয়ে পাতিব লাগিব দিয়কচোন।শইকীয়াই সিদিনা যিখনহে বিয়া পাতিলে! একদম গৰ্জিয়াছ!আমি এতিয়া হেঁচি টেপি থৈ দিলে মানুহে কি ভাৱিব--? "হয়তো--।একেবাৰে সচাঁ--।" আকৌ এবাৰ থিয় দিব লগা হয় বেঙ্কৰ সন্মুখত।হ'ম লোণ, কাৰ লোণৰ ওপৰত এইবাৰ পাৰ্চনেল লোণ।দৰমহাটো দেখোন নাপামেই--!উপায় নাই।যেনেতেনে চলিম আৰু--।বিয়াখনটো হব লাগিব--। বিয়া পাৰ হৈ যায়।ৰাইজে ভুৰি ভুৰি প্ৰশংসা কৰে। "শইকীয়াতকৈও ডাঙৰকৈ পাতিলে হে---।" আকৌ এবাৰ মুখত চিক্‌মিক্‌ বিজুলী চমকে। এইবাৰ অংকত আউল লাগে।কাটি কুটি দিয়া পইচাকেইটাই সংসাৰ জোৰাবলৈ নাটে।ধাৰ মৰাৰ চিন্তাত ৰাতি টোপনি নাহে।প্ৰেচাৰ,চুগাৰ সকলোবোৰেই বাহ বান্ধে শৰীৰত।মাহেকীয়া বাজেটত নতুন খৰচ এটাই ঘৰ বান্ধে--"ঔষধৰ--।" জানো--,পকেটবোৰ বৰ সৰু আমাৰ।অথচ মনবোৰ যে ইমান ডাঙৰ।গাড়ীখন ডাঙৰ হবই লাগিব।ঘৰটোও ডাঙৰ হব লাগিব।এবাৰেইহে বনাব।ঋণৰ ধনেৰে শিলবোৰ জোৰা লাগে---।সপোনবোৰ বাস্তৱৰ দিশত আগবাঢ়ে--।এটা সময়ত ধন শেষ হয়।ৰং,তেল আৰু দুখনমান বেৰৰ প্লাষ্টাৰৰ কাম থাকি যায়।তথাপি মুখত হাঁহি বিৰিঙে।অকনমানহে আছে।এৰিয়াৰ টকা পালে কৰি পেলাম আৰু---। এৰিয়াৰ ধন আহে আৰু যায়।সমস্যায়ো পোখা মেলে।বেৰখন উকা হৈয়ে থাকে।হব--,ৰিটায়াৰ মেণ্টৰ পইচা কেইটাই কৰি দিম আৰু----। এনেকৈয়ে সপোন আৰু সমস্যাৰ নিগনি দৌৰত এটা জীৱন শেষ হৈ যায়।জোৰা ফন্দা মাৰোতে মাৰোতে এবাৰো নিজৰ কথা ভাৱিবলৈ নাই।মুঠতে আমাৰ বাবে নাকটোৱেইহে সাৰ--।বাকী সকলো অসাৰ----। সেইবাবেই কৈছো--- "হয়।আমি মধ্যবিত্ত----।পকেটত এমুঠিমান টকা---।বুকুত বলে নোৱাৰা অলেখ আশা--।মুখখনৰ তুলনাত এহাতমান দীঘল নাক------।" Xokolu loike moi mur torofor pora oxomiyar hiyar amothu rongali totha bohag bihur hiya bhora antorik xuvessa jasilu agotiyakoi ... 🎤🎤🎶সংগীত মোৰ সদাই প্ৰিয় সংগীত মোৰ তেজত সংগীত মোৰ প্ৰানত🎶🎤🎤